मारूळ (ता. यावल) :
मारूळ परिसरातील जिल्हा परिषदच्या शाळा दर शनिवारी सकाळी साडेसातनंतरच सुरू होत असल्याचा गंभीर प्रकार समोर आला आहे. शाळा ठरलेल्या वेळेपेक्षा उशिरा उघडल्याने विद्यार्थ्यांचे शैक्षणिक नुकसान होत असून त्यांच्या शिक्षणाच्या मूलभूत हक्कावर गदा येत आहे.
स्थानिक पालक व ग्रामस्थांच्या माहितीनुसार, शनिवारी शिक्षक उशिरा येतात आणि शाळा साडेसातनंतर सुरू केली जाते. त्यामुळे विद्यार्थ्यांचा अभ्यासाचा वेळ कमी होतो, तर काहीवेळा महत्त्वाचे तासही रद्द केले जातात.
पालकांनी सांगितले की, “दररोज वेळेवर शाळा उघडावी आणि शनिवारचा दिवस शिक्षणासाठी हलकासा समजू नये,” अशी त्यांची मागणी आहे.
या प्रकरणाकडे शैक्षणिक अधिकाऱ्यांचे दुर्लक्ष होत असल्याचा आरोप स्थानिकांकडून करण्यात आला आहे. शिक्षण विभागाने तत्काळ चौकशी करून जबाबदारांवर कारवाई करावी आणि शाळा वेळेवर सुरू व्हाव्यात, अशी सर्वसामान्यांची मागणी आहे.
शैक्षणिक हक्क हा प्रत्येक विद्यार्थ्याचा मूलभूत अधिकार आहे — मात्र, अशा प्रकारच्या निष्काळजीपणामुळे गावातील शिक्षण व्यवस्थेवर प्रश्नचिन्ह निर्माण झाले आहे.
